|
ياخـوي
نا ياخوي
ما نحمل غبينا
وبير السوّ
ما نعرف مكانه
اندير الخير
وانسلّف الزينا
وعندي قلب
دايب بالحنانه
نا ياخوي ما غاب الدليل
عني يوم
لا حاسن أفكاري
لا ونيت من حملي الثقيل
لا وجعت
من صاين اقداري
شمعة اندوب لو ظلم الليل
وثاني يوم
يضاوى نهاري
وكيف الناس لي خاطر ايميل
ومهما ايميل
ما يرضى المهانة
نا ياخوي ما واطيت عيني
لا كافيت
من جافي وقاسي
أنا ما نهون من غالي ويبيني
أنا للشوق
في بحوري مراسي
أنا من قبل ما ندّرق حنيني
للزينين
ينقلني احساسي
ونفرح وين ما احبيب ايجيني
يفوح القلب
ويظلل اجنانه
أنا من ناس ما يخفى نباهم
ناس اجواد
فرسان وعصارا
وقت الباس مايهابو اعداهم
لاجل الوطن
ما يقولو خسارا
فرّاحين كان الضيف جاهم
مولى السر
ما يفشوا اسرارا
واحنا اليوم نتبع في اخطاهم
درب الخير
والمولى عطانا
نا ياخوي ما نحمل غبينـا وبير السوّ ما
نعرف مكانه
اندير الخير وانسلّف الزينا وعندي قلب دايب
بالحنانه
|
